ജിമെയിലില്‍ ഇനി വീഡിയോ,ഓഡിയോ ചാറ്റുകളും

ജി മെയില്‍ ഉപയോക്താക്കള്‍ക്ക് ഇനി സന്തോഷിക്കാം. ഏറെ നാളായി കാത്തിരിക്കുന്ന വീഡിയോ ,ഓഡിയോ ചാറ്റ് സ്സൌകര്യങ്ങള്‍ ജിമെയില്‍ ഉള്‍ക്കൊള്ളിച്ചിരിക്കുന്നു. ജിമെയിലിന്റെ ഒഫീഷ്യല്‍ ബ്ലോഗിലാണ് ഈ വിവരം പ്രസിദ്ധീകരിച്ചിരിക്കുന്നത്.
ഇതിനായി ഓരോ ഉപയോക്താക്കളും വീഡിയോ ആന്റ് ഓഡിയോ ചാറ്റ് പ്ലഗ്-ഇന്‍ ഡൌണ്‍ലോഡ് ചെയ്യണം. http://mail.google.com/videochat എന്ന സൈറ്റില്‍ നിന്നും അതിനുള്ള പ്ലഗ് ഇന്‍ ലഭ്യമാണ്.
ഈ പ്ലഗ് ഇന്‍ ഡൌണ്‍ലോഡ് ചെയ്തതിനു ശേഷം ബ്രൌസര്‍ റീസ്റ്റാര്‍ട്ട് ചെയ്ത് ജിമെയിലില്‍ ലോഗിന്‍ ചെയ്താല്‍ മതി. ഏതൊരാളുമായാണോ വീഡിയോ ചാറ്റ് ചെയ്യേണ്ടത് അയാളുടെ ചാറ്റിലെ ഐഡിയില്‍ ഞെക്കിയാല്‍ കിട്ടുന്ന ചാറ്റ് വിന്‍ഡോയില്‍ ഇപ്പോള്‍ Video & More എന്നൊരു ഓപ്‌ഷന്‍ കൂടെ കാണാം. അതിലെ start video chat എന്ന ബട്ടണ്‍ ക്ലിക്ക് ചെയ്യുക. മറ്റേ വശത്തെ യുസര്‍ നമ്മുടെ വീഡിയോ ചാറ്റിനുള്ള ക്ഷണം സ്വീകരിച്ചാല്‍ വീഡിയോ ഭാഗം ദൃശ്യമാകുകയും തമ്പ്നെയില്‍ ഇമേജായി നമ്മുടെ വീഡിയോ കാണുകയും ചെയ്യും. ഇവിടെ താങ്കള്‍ക്ക് വെബ്‌ക്യാമറ ഇല്ലെങ്കില്‍ താങ്കളുടെജിമെയില്‍ ഇമേജ് ആയിരിക്കും വീഡിയോവിനു പകരം വരിക.

വീഡീയൊ ഫുള്‍ സ്ക്രിനിലേക്കാക്കാന്‍ ഉള്ള ഓപ്ഷനും, സ്വന്തം വീഡിയോ മിനിമൈസ് ചെയ്യാനുള്ള ഓപ്ഷനുമൊക്കെ ഇതില്‍ ലഭ്യമാണ്.

ജിമെയില്‍ വീഡിയോ ചാറ്റിനെ പറ്റി കൂടുതല്‍ അറിയാന്‍ ഈ വീഡിയോ കാണുക.






ന്യൂനതകള്‍

1. ഒരു പ്രധാന പൊരായ്മ ഗ്നു/ലിനക്സില്‍ ഈ പ്ലഗ് ഇന്‍ ലഭ്യമല്ല എന്നുള്ളതാണ്. ഗ്നു/ലിനക്സ് ഉപയോക്താക്കള്‍ ഇനിയും കാത്തിരിക്കേണ്ടി വരും
2. ഈ സൌകര്യം ഉപയോഗിക്കുമ്പോള്‍ ധാരാളം മെമ്മറി ബ്രൌസര്‍ ഉപയോഗിക്കുന്നതായി കാണുന്നു.

മലയാളം വിക്കി പ്രവര്‍ത്തകരുടെ കൂട്ടായ്മ- ഒക്ടോബര്‍ 31-ന്

വിക്കിമീഡിയ ഫൌണ്ടെഷന്റെ മലയാളഭാഷയിലുള്ള വിവിധ വിക്കിസംരംഭങ്ങളില്‍ പ്രവര്‍ത്തിക്കുന്നവരുടെ ഒരു കൂടിച്ചേരല്‍ 2008 ഒക്ടോബര്‍ 31 വെള്ളിയാഴ്ച ചാലക്കുടിയില്‍ വെച്ച് നടത്തുവാന്‍ തീരുമാനിച്ചിരിക്കുന്നു. മലയാളം വിക്കിപീഡിയ, മലയാളം വിക്കിഗ്രന്ഥശാല, മലയാളം വിക്ഷണറി, മലയാളം വിക്കിപാഠശാല, മലയാളം വിക്കിചൊല്ലുകള്‍ തുടങ്ങി വിക്കിമീഡിയ ഫൌണ്ടെഷന്റെ എല്ലാ മലയാളം സംരഭങ്ങളുടേയും കൂട്ടായ്മയാണു ഉദ്ദേശിക്കുന്നത്.

ഒരു ദിവസം മുഴുവന്‍ നീണ്ടു നില്‍ക്കുന്ന പരിപാടിയായി നടത്താന്‍ ആണ് ആഗ്രഹിക്കുന്നത്. മലയാളം വിക്കി സംരഭങ്ങളുമായി പ്രവര്‍ത്തിക്കുന്നവരും, മലയാളം വിക്കി സംരഭങ്ങളെ പരിചയപ്പെടാന്‍ താല്പര്യമുള്ള എല്ലാവരുടേയും സാന്നിദ്ധ്യം ഈ കൂട്ടായ്മയില്‍ അഭ്യര്‍ത്ഥിക്കുന്നു.കൂട്ടായ്മ നടക്കുന്ന കൃത്യമായ സ്ഥലം, പരിപാടികളുടെ വിശദാംശങ്ങള്‍ എന്നിവ 2 ദിവസത്തിനുള്ളില്‍ പരിപാടിയില്‍ സംബന്ധിക്കും എന്നു ഉറപ്പു തന്നവര്‍ക്കു മെയില്‍ ചെയ്യുന്നതാണു്.

പരിപാടിയില്‍ പങ്കെടുക്കുവാന്‍ താല്പര്യമുള്ളവര്‍ anoop.ind@gmail.com, shijualexonline@gmail.com എന്നീ വിലാസങ്ങളില്‍ സാന്നിദ്ധ്യം മെയില്‍ അയക്കുവാന്‍ താല്പര്യം

പ്രത്യേക ശ്രദ്ധയ്ക്ക്: പരിപാടികള്‍ സ്പോണ്‍സര്‍ ചെയ്യാന്‍ ആരും മുന്നോട്ടു വരാത്തതിനാല്‍ ഇതിനു വേണ്ടി വരുന്ന എല്ലാ ചെലവുകളും തുല്യമായി പങ്കിട്ടെടുക്കുന്നതാണ്. ഏവരും സഹകരിക്കണം എന്നു അഭ്യര്‍ത്ഥിക്കുന്നു.

ഗൂഗിള്‍ ക്രോമും മലയാളവും

ഇന്നലെ ഗൂഗിള്‍ പുറത്തിറക്കിയ ക്രോം എന്ന സോഫ്റ്റ്വെയറിന്റെ ഏറ്റവും വലിയ പ്രത്യേകതയായി തോന്നിയത് അതിന്റെ മലയാളം റെന്‍ഡറിങ്ങ് സപ്പോര്‍ട്ട് ആണ്. ഡീഫാള്‍ട്ട് ഫോണ്ട് കാര്‍ത്തികയാണെങ്കിലും അഞ്ജലി ഓള്‍ഡ് ലിപി ഇന്‍സ്റ്റാള്‍ ചെയ്തിട്ടുള്ളവര്‍ക്ക് അതിലേക്ക് മാറാനുള്ള സൌകര്യവും ക്രോം ടീം ഒരുക്കിയിട്ടുണ്ട്.
ഫോണ്ട് അഞ്ജലിയാക്കാന്‍
ക്രോമില്‍ ഫോണ്ട് അഞ്ജലിയാക്കാന്‍ താഴെ പറയുന്നവ ചെയ്യുക.
അഡ്രസ് ബാറിന്റെ (ഗൂഗീള്‍ ഭാഷയില്‍ ഓംനി പോയന്റ്) അടുത്തുള്ള ടൂള്‍ ബോക്സിന്റെ ചിത്രം ഞെക്കുക.അവിടെ നിന്നും Options തെരഞ്ഞെടുക്കുക. അപ്പോള്‍ ഒരു ചെറിയ വിന്‍‌ഡോ തുറന്നു വരും.



അവിടെ രണ്ടാമത്തെ ടാബിലെ change font and language settings എന്ന ബട്ടണ്‍ ഞെക്കി font Anjalioldlipi-യും Encoding Unicode(UTF-8) -ഉം ആക്കുക .ശേഷം OK, Close എന്നീ ബട്ടണുകള്‍ ഞെക്കിയാല്‍ ഫോണ്ട് അഞ്ജലിയാകും.

മലയാളം നന്നായി റെന്‍‌ഡര്‍ ചെയ്യുന്നു എന്നതാണു ക്രോമിന്റെ പ്രത്യേകതകളില്‍ ഒന്ന്. ഫയര്‍ഫോക്സിന്റെ മൂന്നാമത്തെ പതിപ്പില്‍ മാത്രമാണ് മലയാളം റെന്‍ഡറിങ്ങ് ശരിയായത് എന്ന് ഓര്‍ക്കുക.

ക്രോമും,കീമാനും

ഗൂഗിള്‍ ക്രോമും കീമാന്‍ എന്ന മലയാളം എഴുത്തുപകരണവും തമ്മില്‍ അത്ര സ്വരച്ചേര്‍ച്ചയില്ലേ എന്നൊരു സം‌ശയം. കീമാന്‍ ഉപയോഗിച്ച് ക്രോമില്‍ എഴുതിയാല്‍ ഒന്നും വരുന്നില്ല.ഉദാഹരണമായി മലയാളം എന്ന് ക്രോമില്‍ കീമാന്‍ ഉപയോഗിച്ച് എഴുതുന്നു എന്നിരിക്കട്ടെ. മ എന്നെഴുതി ല എന്നെഴുതുമ്പോള്‍ മ കാണാതാകും. അവിടെ ല മാത്രമാകും. ഇനി അടുത്ത അക്ഷരം എഴുതുമ്പോളേക്കും ല യും അപ്രത്യക്ഷമാകും. അവസാനം മലയാളം എന്നെഴുതിയാല്‍ ഒരു ചിഹ്നം മാത്രമാകും ഫലം.

ഗൂഗിള്‍ പോലൊരു കമ്പനി നല്‍കുന്ന ഉല്പന്നത്തില്‍ നിന്ന് ഒരു ഉപയോക്താവും പ്രതീക്ഷിക്കാത്തത്ര വലിയ ബഗ്ഗ് ആണിത്. വിന്‍‌ഡോസില്‍ മലയാളം ഉപയോഗിക്കുന്ന പലരും ഇന്ന് കീമാന്‍ ആയിരിക്കും എഴുത്തുപകരണമായി ഉപയോഗിക്കുന്നത്. അപ്പോള്‍ ഈ ഒരു ബഗ്ഗ് മലയാളം ബ്ലോഗെഴുത്തുകാരെയും മറ്റും ക്രോമില്‍ നിന്ന് അകറ്റി നിര്‍ത്തുകയേ ഉള്ളൂ.
ഗൂഗിള്‍ ഈ ബഗ്ഗ് പെട്ടന്നു തന്നെ ഫിക്സ് ചെയ്യുമെന്നു കരുതാം...

ഗൂഗിള്‍ ക്രോം

മോസില്ല ഫയര്‍ഫോക്സും,ഇന്റര്‍നെറ്റ് എക്സ്പ്ലോററും,ഓപ്പറയും,സഫാരിയും,ഫ്ലോക്കും,മാക്സ്ത്തോണും ഒക്കെ കീഴടക്കി വെച്ചിരിക്കുന്ന ഇന്റര്‍നെറ്റ് ബ്രൌസര്‍ രംഗത്തേക്ക് വിവരസാങ്കേതിക വിദ്യാ രംഗത്തെ അതികായകന്മാരായ ഗൂഗിളും വരുന്നു. ഗൂഗിള്‍ ക്രോം എന്ന് പേരിട്ടിരിക്കുന്ന ബ്രൌസറുമായിട്ടാണ് ഇവര്‍ ബ്രൌസര്‍ രംഗം കീഴടക്കാന്‍ വരുന്നത്. മറ്റു ഏതെങ്കിലും ബ്രൌസറുകളെ അടിസ്ഥാനമാക്കാതെ പുതുതായി ഗൂഗിള്‍ തന്നെ വികസിപ്പിച്ചെടുത്തിരിക്കുന്ന ബ്രൌസര്‍ ആണ് ക്രോം. ഇക്കാലത്തെ മെയില്‍,ചാറ്റ്,യൂറ്റ്യൂബ് തുടങ്ങിയ സര്‍വ്വീസുകള്‍ പ്രദാനം ചെയ്യുന്ന വെബ്‌സൈറ്റുകള്‍ വെബ്അപ്ലിക്കേഷനുകള്‍ തന്നെയാണെന്നാണ് എന്ന തിരിച്ചറിവാണ് ഇങ്ങനെയൊരു ബ്രൌസറുമായി അവതരിക്കുവാന്‍ ഗൂഗിളിനെ ചിന്തിപ്പിച്ചതെന്ന് അവരുടെ ബ്ലോഗ് പറയുന്നു.

ഇന്റര്‍നെറ്റ് വഴി ആര്‍ക്കും ഈ ബ്രൌസര്‍ സൌജന്യമായി ഡൌണ്‍ലോഡ് ചെയ്യാവുന്ന ഈ ബ്രൌസര്‍ വിന്‍‌ഡോസ്,ലിനക്സ്,മാക്ക് തുടങ്ങിയ ഓപ്പറേറ്റിംഗ് സിസ്റ്റങ്ങളില്‍ ഇന്‍സ്റ്റാള്‍ ചെയ്യാം. ഡൌണ്‍ലോഡ് ലിങ്ക് ഗൂഗിളിന്റെ സൈറ്റില്‍ പ്രത്യക്ഷപ്പെടുന്നതും കാത്തിരിക്കുകയാണ് ഗൂഗിളിന്റെ അനേകം അഭ്യുദയകാംക്ഷികള്‍.

ഇടമറുക് ദുബായില്‍

സ്വതന്ത്ര്യദിന പിറ്റേന്ന് മലയാള പത്രങ്ങള്‍ക്ക് അവധിയായതു കൊണ്ടും ഒന്നും വായിക്കാന്‍ ഇല്ലാത്തതു കൊണ്ടും ഇന്നലത്തെ പത്രം എടുത്ത് ഒന്നു കൂടി വായന ആരംഭിച്ചു. വാര്‍ത്തകള്‍ എല്ലാം കഴിഞ്ഞതിനു ശേഷം ശ്രദ്ധ ക്ലാസിഫൈഡ്സില്‍ ആയി. അപ്പോഴാണ് ഒരു വാര്‍ത്ത ശ്രദ്ധയില്‍ പെട്ടത്.

ഇടമറുക് ദുബായില്‍

ശാസ്ത്രാധിഷ്ഠിത ജ്യോതിഷ വാസ്തുശാസ്ത്ര രത്നശാസ്ത്ര നിര്‍ദ്ദേശങ്ങള്‍,ജീവിതപ്രശ്നങ്ങള്‍ക്ക് പരിഹാരങ്ങള്‍ 050178****

മലയാളത്തില്‍ ഇടമറുക് എന്ന പേരില്‍ അറിയപ്പേടുന്നത് പ്രശസ്ത പത്രപ്രവര്‍ത്തകനും,ഗ്രന്ഥകാരനും യുക്തിവാദിയും ആയിരുന്ന ജോസഫ് ഇടമറുക് ആയിരുന്നു. 2006 ജൂണ്‍ 29-നായിരുന്നു ജോസഫിന്റെ മരണം . അദ്ദേഹത്തിന്റെ മകന്‍ സനല്‍ ഇടമറുകും ഇപ്പോള്‍ യുക്തിവാദ പ്രസ്ഥാനങ്ങളുമായി ബന്ധപ്പെട്ടു പ്രവര്‍ത്തിക്കുന്നു. സനലിന്റെ നേതൃത്വത്തില്‍ പ്രവര്‍ത്തിക്കുന്ന തേരാളി എന്ന വെബ്‌സൈറ്റ് കാണുക.

ഈ ഇടമറുക് കുടുംബത്തിലെ ആരാണാവോ ശാസ്ത്രാധിഷ്ഠിത ജ്യോതിഷ വാസ്തുശാസ്ത്ര രത്നശാസ്ത്ര നിര്‍ദ്ദേശ മേഖലയില്‍ പ്രവര്‍ത്തിക്കുന്നത്?
ചിത്രങ്ങള്‍ക്ക് കടപ്പാട് മലയാളം വിക്കിപീഡിയ

സൂര്യഗ്രഹണവും സോഫ്റ്റ്‌വെയര്‍ നിര്‍മ്മാതാക്കളും

ഇന്ന് സൂര്യഗ്രഹണം ആയിരുന്നു. ഇന്ത്യയില്‍ 4.30 മുതല്‍ 6.30 വരെ ആയിരുന്നു ഗ്രഹണ സമയമെന്ന് പറയപ്പെട്ടത്. ഈ സമയം എന്റെ ഓഫീസ് കാന്റീനിലേക്ക് ഞാനൊന്ന് പോയപ്പോള്‍ അവിടം ഏറെക്കുറെ ശുന്യം ! ഗ്രഹണ സമയത്ത് ഭക്ഷണം കഴിക്കരുതെന്നും, അതിനു ശേഷം കുളിച്ചു വേണം ഭക്ഷണം കഴിക്കാന്‍ എന്നും എന്റെ സുഹൃത്ത് പറഞ്ഞു. അതിനു മുന്‍പും ഉച്ചക്കു എവിടെ ഒക്കെയോ നിന്ന് ചില ശബ്ദങ്ങള്‍ കേള്‍ക്കാമായിരുന്നു "Today we have to take tea early!".

ഗൂഗിളും ‘കുയിലും‍‘

ഇനി കുയിലും തിരയും. ഇന്റര്‍നെറ്റ് രംഗത്ത് ഏറ്റവുമധികം മത്സരം നടക്കുന്ന സെര്‍ച്ചിങ്ങ് മേഖയിലേക്ക് ഒരു പുതിയ സെര്‍ച്ച് എഞ്ചിന്‍ കൂടി അവതരിച്ചിരിക്കുന്നു. സെര്‍ച്ച് എന്നതിന്റെ പര്യായം തന്നെയായി മാറിയ ഗൂഗിളിനോട് മത്സരിക്കാന്‍ തന്നെയാണു കുയിലിന്റെ പുറപ്പാട്. world’s biggest search engine എന്നാണ് കുയിലിനെ പറ്റി അതിന്റെ നിര്‍മ്മാതാക്കള്‍ തന്നെ പറയുന്നത്.
ഇതുവരെ കുയില്‍ എന്ന് പറഞ്ഞുവെങ്കിലും ശരിയായ ഉച്ചാരണം കൂള്‍ എന്നാണ്. ഐറിഷ് ഭാഷയില്‍ knowledge എന്നര്‍ത്ഥം വരുന്ന പദമാണ് Cuil. 121 ബില്യണ്‍ വെബ് പേജസില്‍ നിന്ന് സെര്‍ച്ച് ചെയ്ത് നിങ്ങള്‍ ആവശ്യപ്പെട്ട വിവരങ്ങള്‍ നിമിഷങ്ങള്‍ക്കകം നിങ്ങളുടെ മുന്നിലെത്തിക്കാന്‍ കൂളിനു കഴിയുമെന്നാണ് ഇതിന്റെ നിര്‍മ്മാതാക്കള്‍ അവകാശപ്പെടുന്നത്. ആകെ വെബ്‌പേജുകളുടെ എണ്ണം ഗൂഗിളിന്റെ മൂന്നിരട്ടി വരും.
ഗൂഗിളില്‍ സെര്‍ച്ച് ആര്‍ക്കിടെക്ട് ആയിരുന്ന അന്ന പാറ്റേര്‍സണും, അന്നയുടെ ഭര്‍ത്താവും സ്റ്റാന്‍ഫോര്‍ഡ് സര്‍‌‌വ്വകലാശാലയില്‍ പ്രഫസറായ ടോം കോസ്റ്റലേയുമാണ് കൂള്‍ എന്ന ഈ പുതിയ സെര്‍ച്ച് എഞ്ചിന്റെ അമരക്കാര്‍.

കൂളിന്റെ ഏറ്റവും വലിയ പ്രത്യേകതയായി അവകാശപ്പെടാവുന്നത് കാറ്റഗറി തിരിച്ചുള്ള സെര്‍ച്ച് റിസല്‍ട്ടുകളും , ടാബ് രീതിയാണ്. ഉദാഹരണമായി നിങ്ങള്‍ ഹാരി എന്ന് കൂളില്‍ തിരയുന്നു എന്ന് കരുതുക. ആദ്യമായി എല്ലാ റിസല്‍ട്ടും ആദ്യത്തെ ടാബില്‍ കാണും.പിന്നീട്‍ ഹാരി പോട്ടര്‍ എന്നത് ഒരു ടാബിലും ഹാരി ആന്റ് ഡേവിഡ് എന്നൊരു റിസല്‍ട്ട് മറ്റൊരു ടാബിലും മറ്റു റിസല്‍ട്ടുകള്‍ മറ്റു ടാബുകളിലും പ്രത്യക്ഷപ്പെടും. ഇതില്‍ അനുയോജ്യമായത് തിരഞ്ഞെടുക്കുന്നത് സാധാരണ സെര്‍ച്ച് എഞ്ചിനുകളില്‍ നിന്ന് തെരയുന്നതിനേക്കാള്‍ എളുപ്പമാണല്ലോ.
ഗൂഗിളും,യാഹുവും,മൈക്രോസോഫ്റ്റും കുത്തകകള്‍ ആക്കി വെച്ചിരിക്കുന്ന സെര്‍ച്ച് എഞ്ചിന്‍ മേഖലയിലേക്ക് പ്രവേശിക്കാന്‍ കൂളിനു കഴിയുമോ? കാത്തിരുന്നു കാണേണ്ടി വരും..
പ്രധാന പോരായ്മകള്‍

1. ഈ സെര്‍ച്ച് എഞ്ചിനില്‍ യൂനികോഡ് സെര്‍ച്ച് ലഭ്യമല്ല. അതായത് മലയാളത്തില്‍ നിങ്ങള്‍ വല്ലതും സെര്‍ച്ച് ചെയ്യാന്‍ കൊടുത്താല്‍ കുയില്‍ നാദം നിലക്കുമെന്നര്‍ത്ഥം.
   
2. കൂളിന്റെ പേജെടുത്ത് cuil എന്നൊന്ന് തിരഞ്ഞ് നോക്കുക. വളരെ രസകരമാണ് റിസല്‍ട്ട് പേജ്. ആ പേജിലെവിടെയും കൂള്‍ എന്ന സെര്‍ച്ച് എഞ്ചിനെക്കുറിച്ച് പറയുന്നതേയില്ല. ഇനി ഗൂഗിളിലും Cuil എന്നൊന്ന് സേര്‍ച്ച് ചെയ്യുക. ആദ്യത്തെ റിസല്‍ട്ട് തന്നെ Cuil സെര്‍ച്ച് എഞ്ചിനെ പറ്റിയാണ്. ഈ കുയില്‍ കുറെ നാള്‍ പാട്ടു പാടുമോ?